Boedeloorgawe Sonder Eiendom

Wat behels 'n Boedeloorgawe
Sonder Eiendom?

"Dit is nie geluk wat ons dankbaar maak nie, dit is dankbaarheid wat ons gelukkig maak."

Boedeloorgawe is ‘n proses wat daargestel is deur die Howe om persone te help wat as gevolg van onvoorsiene omstandighede nie meer in staat is om hulle skuld te betaal nie.

’n Boedeloorgawe stel jou instaat om weer ’n meer normale finansiële lewe te lei – waar jy volgens jou inkomste kan lewe. Na ‘n boedeloorgawe sal jy weer jou selfoon of telefoon kan antwoord sonder vrees. Jy sal ‘n antwoord hê vir skuldeisers wat jou dag en nag bel vanaf “private numbers”. Jy hoef nie meer skrikkerig te wees dat die vreemde motor by jou huis dalk die Balju is wat weer sy opwagting maak nie.

Die boedeloorgawe proses is kortliks as volg:

Eerstens word daar 'n advertensie gepubliseer in beide die Staatskoerant en ‘n plaaslike koerant. Hierdie advertensie is baie belangrik want dit stop alle geregtelike gedinge teen jou, soos byvoorbeeld die beslaglegging op meubels en die verkoop van vaste eiendom, ensovoorts.
Ons gebruik die inligting wat jy op die aansoekvorm voltooi het om 'n vermoëstaat namens jou op te stel. Maak asseblief baie seker dat al jou skuldeisers (alle persone of instansies aan wie jy geld skuld) in die aansoekvorm gelys word – nie ons of jy wil later onkant betrap word nie. Jy moet hierdie vermoëstaat voor 'n Kommissaris van Ede onderteken. Hierdie dokument word vir 14 (veertien) dae ter insae gelê by die Meester van die Hooggeregshof en by ‘n plaaslike Landdroshof waarna ‘n sertifikaat uitgereik word. Vir ‘n dokument om ter insae te lê beteken dat jou vermoëstaat publieke inligting is wat enige persoon of instelling kan gaan lees by die Meester, en hul kan ook gedurende hierdie tydperk by die Meester beswaar indien – dit gebeur baie selde.
Na ons die Meester se sertifikaat ontvang het word daar per geregistreerde pos aan al jou skuldeisers kennis gegee van jou vrywillige boedeloorgawe. Dit stel hulle instaat om ons te kontak met enige verdere navrae. Ons stuur dieselfde kennisgewing ook aan jou – sou ‘n skuldeiser jou kontak, stuur jy die kennisgewing aan hulle.
Ons stel die Ontvanger van Inkomste (SARS) in kennis van die boedeloorgawe ongeag of jy 'n geregistreerde belastingbetaler is of nie.
‘n Funderende verklaring word deur ons namens jou opgestel wat inligting bevestig oor jou huidige omstandighede – dit brei uit oor die redes wat aanleiding gegee het tot die finansiële probleme wat jy tans ondervind. Die nuutste rekeningstate van al die skuldeisers word hierby aangeheg. Jy moet hierdie verklaring voor ‘n Kommissaris van Ede onderteken.
Op die dag van die hofverrigtinge stuur ons 'n Advokaat om namens jou in die Hooggeregshof te verskyn - jy verskyn dus geensins in die Hof nie. Ons sal jou in kennis stel van die Regter se besluit.
Nadat die aansoek deur die Hof toegestaan is, word daar 'n Kurator deur die Meester van die Hoogeregshof aangestel wat jou insolvente boedel moet hanteer. Die Kurator sal jou kontak vir ‘n konsultasie of sal ‘n skrywe aan jou rig waarin die proses aan jou verduidelik word. Hou in gedagte dat jy na vier jaar kan rehabiliteer indien die Kurator die nodige toestemming gee.
Ons hou jou deurgaans op hoogte van verwikkelinge sodat jy weet waar ons met die aansoek staan.

Belangrike Punte:

Wat van die meubels en ander los bates?

Die Hofreëls bepaal dat jy ‘n persentasie van die totale skuld aan die Kurator moet betaal. Hierdie persentasie wissel van Hooggeregshof tot Hooggeregshof. Indien jou totale skuld byvoorbeeld R500,000 beloop sal jy ongeveer R160,000 terugbetaal, en as jou totale skuld byvoorbeeld R300,000 beloop sal jy ongeveer R105,000 terugbetaal. Die bedrag werk op ’n glyskaal. Hierdie bedrag sluit reeds vasgestelde kostes in wat beteken dat jy nie op ‘n latere stadium verras sal word met ekstra kostes nie. Alles word voor die tyd presies bereken en jy sal dan weet wat die terugbetaling gaan wees.

‘n Groot voordeel is dat die bedrag wat jy terugbetaal sonder rente bereken word. Ons onderhandel saam met jou met die Kurator om hierdie bedrag terug te betaal – gewoonlik oor tussen 18 en 24 maande.

Vir jou om hierdie geld te genereer doen ons die volgende in terme van die Hofreëls:

- Ons gee opdrag aan ‘n Waardeerder om ‘n afspraak met jou te reël sodat jou bates waardeer kan word. Ons gebruik verskillende Waardeerders in verskillende provinsies. Die Waardeerders is taktvol en sal jou en jou bates met respek hanteer.
- Indien jy nie ‘n vaste eiendom byvoorbeeld ‘n huis, woonstel, plaas, ensovoorts het nie, doen ons ‘n “los bate boedeloorgawe”.
- Die Kurator kry toestemming by die Meester van die Hooggeregshof dat jy die bates terug kan koop – met ander woorde jy koop jou eie bates terug sonder dat dit verwyder word. Ons stel ‘n koopkontrak op wat jy onderteken waarin hierdie paaiemente uiteengesit word – indien jy byvoorbeeld R200,000 skuld betaal jy R80,000 terug in 24 paaiemente wat dan R3,333.33 per maand sal wees. Sommige kliënte verkies om dit vinniger klaar te betaal aangesien daar skielik nie meer skuld is nie en is hulle sodoende in ‘n beter finansiële posisie.

Wat gebeur met die voertuie?

Indien jy ‘n voertuig op jou naam gekoop het en dit met huurkoop gefinansier het, bepaal die Hofreëls dat die bankinstelling die voertuig kan terugneem. Indien jy enige reëlings met die Bank wil tref in verband met jou voertuig, moet dit gedoen word voor die boedeloorgawe – dit moet ook met die Kurator opgeneem word. Let asseblief daarop dat sekere instansies geen reëlings aanvaar nie.
Indien jy ‘n voertuig op jou naam gekoop het en dit met bruikhuur (‘lease met balloon’ – met aflosbedrag) gefinansier het, is die voertuig relatief veilig solank die paaiemente op datum gehou word. Die besluit bly egter by die Bank. Omrede ‘n bruikhuur buite die sekwestrasie val, het van die Banke gewoonlik nie ‘n probleem nie, solank die voertuig se paaimente en versekering stiptelik betaal word.
Indien die voertuig wat jy gebruik op iemand anders se naam geregistreer is en jy net die paaiemente gereeld betaal, is daar geen gevaar dat jy die voertuig sal verloor nie.

Speel my Huwelikstatus 'n rol?

Indien jy binne gemeenskap van goedere getroud is, beteken dit dat albei partye gesekwestreer gaan word,
Indien jy buite gemeenskap van goedere getroud is, sekwestreer jy alleen. Die proses benadeel glad nie die ander party nie. Dit sal slegs die ander party raak in ‘n geval waar albei gades finansiële probleme het en beide gesekwestreer wil word. In so ‘n geval word twee aparte aansoeke gebring.

Ons Jurisdiksie

Ons het ‘n kantoor in Melkbosstrand,Brackenfell en Mosselbaai (Wes-Kaap) sowel as in Pretoria (Gauteng).

Ons het jurisdiksie in Gauteng, Limpopo, Mpumalanga, Noord-Wes en die Wes-Kaap.

Wat is die verskil tussen boedeloorgawe (sekwestrasie/insolvensie), skuldberading en administrasie?

Boedeloorgawe

'n Aansoek word in die Hooggeregshof gebring. Hierdie aansoek kan binne 5 (vyf) weke op die rol wees.
Hofreëls bepaal dat al die skuldeisers ingesluit word en die Hofbevel moet deur almal aanvaar word.
Daar is nie ‘n maksimum wat jy kan skuld nie.
Indien dit gebeur dat vaste bate (bv. huis, woonstel, plaas, ens.) verkoop word vir minder as wat die uitstaande verband is, word die res van die skuld afgeskryf.
Jy mag geen verdere skuld aangaan nie.
Indien jy vaste eiendom het (bv. huis, woonstel, plaas, ens.) sal die Trustee dit moet verkoop om jou skuldeisers te betaal.

Skuldberading

‘n Aansoek word in die Landdroshof gebring maar kan daar tot ‘n jaar gewag word vir ‘n hofdatum.
As daar reeds regsstappe geneem is, word daardie skuld uitgesluit.
Daar is nie ‘n maksimum wat jy kan skuld nie.
Jy betaal al die skuld terug plus rente en kostes. Die afbetalingstermyn kan tot 30 jaar wees.
Jy mag geen verdere skuld aangaan nie.
Geld word aan ‘n “betaal-verspreidingsagent” oorbetaal en hulle betaal jou skuldeisers.
Indien jy vaste eiendom het (bv. huis, woonstel, plaas, ens.) sal jy dit kan behou indien die Bank ‘n verminderde paaiement sal aanvaar, daar nog geen regstappe teen jou geneem was nie en die eiendom nie agterstallig is nie.
As jou skuld voortspruit uit ŉ besigheid, mag dit nie deel vorm van jou skuldberading nie.

Administrasie

‘n Aansoek word in die Landdroshof gebring. Die aansoek kan binne 2 (twee) maande op die rol wees.
“Cash loans” ooreenkomste bepaal dat hulle nie deel vorm van administrasie nie. Indien jy dus enige “cash loans” het, moet jy dit nogsteeds betaal.
Die maksimum skuld vir ‘n administrasie-aansoek beloop R50,000..
Indien jy byvoorbeeld R50,000 skuld word daar steeds rente en kostes bygevoeg – met ander woorde jy sal ongeveer R132,000 terugbetaal.
Jou werkgewer moet toestem dat die terugbetaling direk van jou salaris afgetrek kan word (“garnishee order” teen jou salaris).
Jy mag geen verdere skuld aangaan nie

Nadele van 'n boedeloorgawe sonder eiendom:

Jy sal insolvent wees vir die volgende 4 (vier) jaar waartydens jy nie kredietwaardig sal wees nie. Gedurende hierdie tydperk mag jy geen nuwe skuld aangaan nie.
Jy mag nie kredietkaarte gebruik nie en geen skuld in hierdie tyd aangaan nie.
Die enigste manier om jou kredietrekord weer skoon te kry is om na 4 (vier) jaar ‘n aansoek vir rehabilitasie by dieselfde Hooggeregshof te bring. Andersins sal jy vir ‘n tydperk van 10 (tien) jaar nie kredietwaardig wees nie.

Voordele van 'n boedeloorgawe sonder eiendom:

Jou salaris en ander inkomste (indien van toepassing) bly jou eie en jy betaal geen verdere skuld aan enige krediteur nie. Die Kurator gaan wel soms ‘n staat van jou inkomste en uitgawes verlang.
Slegs jou skuldeisers word in kennis gestel van die proses. Ons stel nie jou werkgewer of enigiemand anders in kennis nie – hul behoort dus nie kennis hiervan te dra nie (tensy hul byvoorbeeld die advertensie in die koerant gesien het).
Jy verskyn nooit self in die Hooggeregshof nie.
Indien jy ‘n voertuig op jou naam gekoop het en dit met bruikhuur (‘lease met balloon’ – met aflosbedrag) gefinansier het, kan die Kurator met die finansiële instelling reël vir jou om jou voertuig te behou – jou paaiement en versekering moet net stiptelik betaal word en op-datum gehou word. Die besluit bly egter by die Bank.
Ons sal graag wil belowe dat skuldeisers jou nooit weer gaan skakel of sms nadat die aansoek toegestaan is nie. Ongelukkig gebruik sommige skuldeisers ander instansies om hulle skuld in te vorder, so dit het al ‘n paar keer gebeur dat weer gekontak is. In so ‘n geval stuur jy net die Hofbevel aan hulle.- jy het nie nodig om enige skuldeiser verder te ontduik nie.

Die belangrikste: FINANSIëLE VRYHEID. Jy en jou gesin kan ‘n nuwe begin maak – skuldvry. Jy hoef dus nie meer te skrik vir die onbekende nommers op jou selfoon nie. Dit help nie om vir jou finansiële probleme te vlug nie. Sorteer dit uit met die hulp van ‘n vrywillige boedeloorgawe..

Koste van 'n boedeloorgawe sonder eiendom:

Ons ontvang ons fooie vir die bring van die aansoek (boedeloorgawe/sekwestrasie/insolvensie) eers wanneer die transaksie rakende jou bates deur die Kurator afgehandel is.

Die aanvanklike uitgawes/kostes vir ons om die aansoek namens jou te hanteer beloop R8,900.00 Dit word as volg saamgestel:

Die Staatskoerant se advertensiekoste beloop ongeveer R73.00
Die plaaslike koerant se advertensie beloop ongeveer R990.00
Die Waardeerder se rekening beloop soms tot R3,500.00
Die Advokaat wat namens jou in die Hof verskyn beloop ongeveer R1,400.00 per verskyning
Verdere kostes is geregistreerde pos wat ons aan elk van jou skuldeisers moet stuur, die koste daarvan beloop ongeveer R32.00 per skrywe, en
Hierby ingesluit is al die oproepe, fakse en e-pos boodskappe wat ons namens jou hanteer.

Ons moet die betaling van die R8,900,00 vir die uitgawes/kostes ontvang voordat ons met die boedeloorgawe kan begin. Die oomblik nadat jy die dokumente onderteken het, begin ons uitgawes/kostes dadelik. Ons moet die Advokaat, Waardeerder, Staatsdrukker ensovoorts onmiddellik na ‘n instruksie betaal.

Hou asseblief in gedagte dat ons ‘n kennisgewing aan jou gee wat jy dan aan enige skuldeisers kan faks/epos om hulle in kennis te stel van die aansoek. Dit stel jou in staat om die R8,900 te betaal.

Jy is welkom om die uitgawe/kostes in die “boedeloorgawe-mark” te toets. Die gemiddelde deposito wat firmas verlang alvorens hulle met enige aksie begin of jou te woord sal staan, beloop ongeveer R30,000. Sommige firmas in Johannesburg/Midrand vra tot R40,000 om die uitgawes te dek vir so ‘n aansoek. Verskeie firmas in die Wes-Kaap en Gauteng maak nie ‘n geheim daarvan dat hulle nie ‘n kliënt te woord wil staan indien daar nie eers ‘n deposito van ten minste R15,000 in hulle rekeninge betaal is nie.

Indien dit egter vir jou onmoontlik is om die bedrag in een paaiement of dadelik te betaal, kan jy dit afbetaal in twee paaiemente, maar ons moet eers die totaal van R8,900.00 ontvang voordat ons met die aansoek kan begin. Ons kan intussen vir jou die dokument gee dat ons ‘n aansoek om boedeloorgawe gaan bring maar ons kan niks formeel doen alvorens die R8,900.00 in totaal by ons inbetaal is nie. Aangesien hierdie bedrag slegs jou aansoek se uitgawes/kostes dek, is dit ‘n maatskappy beleid en kan ons nie daarvan afwyk nie – dankie vir jou begrip.

Ter afsluiting

Moet asseblief nie dat jy ook om die bos gelei word deur instansies wat aanbied om jou te help vir R4,000 of R5,000 nie. Daardie instansies se kliënte eindig ongelukkig gewoonlik by ons op omdat daar óf niks gebeur nie óf omdat alles verkeerd loop en daardie instansies geen idee het hoe om insolvensies te doen nie.

Ons eerste inligtingsblaaie is in 2006 deur my persoonlik geskryf. Ander instansies gebruik ons inligting woord vir woord op hul webblaaie en brosjures – spelfoute en al! Dikwels spog hulle met 20 of 30 jaar ondervinding intussen het ons hulle opgelei 5 jaar terug!

Om sulke instansies te gebruik kan jou duur te staan kom, en op die ou end gaan jy in elke geval terug kom na ons toe. Ons eie kliënte is ons grootste verwysings!

Die inligting in hierdie dokument is die harde feite – geen skrikmaak of verskuilde praatjies nie.

Tyd is ‘n baie groot faktor, veral as die Balju jou reeds op die naam groet.

Die bal moet so gou as moontlik aan die rol gesit word – waarmee ons kan help.

08.00 – 16.30

Kontak ons